Esti ye una blogue onde vas atopar información a esgaya al rodiu Asturies (la so llingua propia, les sos costumes, la so xente, los chigres más afayadizos onde xintar, ....) amás de semeyes de los mios viaxes, los mios programes de radio-tv y munches otres coses prestoses. ¡¡Afayaivos!!


"Desasturianización" d'Asturies


Faime ablucar el güeyar al mio redor lo que ye'l mio país astur.

Un llugar onde, amás de munchos de los nuesos políticos autóctonos, la mayor parte de la nuesa xente nun-y da valir a lo de nueso porque semeya calar na nuesa sociedá esi vieyu discursu xacobín, tan espardíu pol "réxime" FSA-PSOE que mos gobierna col sofitu ideolóxicu de los partíos PP ya IX, de dexar pa práu les coses del llar pa enfotase nos problemes de tierres alloñaes de nós, sumáu al célebre grandonismu asturianu, los nuesos complexos d'inferioridá y la más que duldosa "llealtá" a la que sé yo estructura política estatal (como si pal restu'l estáu fueremos dalgu fundamental y de gran interés mediáticu, cultural, etc cuando paezme a mi que somos, día tres día, una pequeña, irrelevante, ensin pesu,.... "rexón" colo que tóu eso implica).

D'esta semiente xurden los díes d'Asturies con Pantojas y Chenoas, los Niemeyeres, les ciudaes de la cultura, les TPAs,.......

Baxu la mio opinión, si nós mesmos nun facemos un exerciciu d'autoestima coleutiva, el nuesu futuru como pueblu va camín de la desapaición. Nun somos nin más nin menos que naide en tolos aspeutos (cultural, llingüisticu, territorial, paisaxísticu, económicu, etc). Creo humildemente que de nun trabayar nesa llínea, seldría una llaceria nun solmente pa nós mesmos sinon pa la cultura universal en xeneral.

Remataría cola cita d'un escritor vascu (Julio Caro Baroja) que ta dientro del llibru "Tu como yo" d'Inaciu Iglesias pa espresar que toos estes reflexones xurden dende lo más fondero de mi mesmu:

"Si hai una identidá hai que la buscar nel AMOR. Nin más, nin menos. AMOR al país en que nacimos o vivimos. Amar los sos picos, praos, montes, amar la so llingua y les sos costumes, ensin exclusivismos. AMOR a los sos grandes homes y non namás a un grupín d'ente ellos. AMOR tamién a los sos vecinos y a los que nun son como nós".

P'algamar una Asturies más asturiana hai que lo trabayar día tres día col AMOR polo nueso.

No hay comentarios: