Esti ye una blogue onde vas atopar información a esgaya al rodiu Asturies (la so llingua propia, les sos costumes, la so xente, los chigres más afayadizos onde xintar, ....) amás de semeyes de los mios viaxes, los mios programes de radio-tv y munches otres coses prestoses. ¡¡Afayaivos!!


Algamaremos l'Asturies pola que lluchemos



Esta blogue ye un l.lugar áu faigo estremaos alderiques al rodiu d'Asturies y les/os asturianes/os. Esta vegada voi afondar sobro varios temes:

-Como diz el títulu, algamaremos l'Asturies pola que lluchemos, quier dicir, nesta tierra de nuesu nun ye solmente los pilancos que la nuesa élite política naftalosa pon al desendolcu de la propia identidá, sinon que muncha xente ente nós siente vergoña polo que somos, pol nuesu raigañu, poles nueses propies realidaes, problemes ya éso fainos nun dir p'alantre de nenguna de les menes (nin económica, nin cultural, nin identitaria, etc). Somos tan grandones que-y damos más importancia a les "ballenes d'Australia" que a lo qu'asocede na nuesa tierra............qué tristura tan fonda

-L'aculturación ye llaceriante. Paezme humildemente que fai falta "asturianizar" abondu Asturies. Tóu esi "modus operandi" de les clases dirixentes ya élites inteleutuales onde la llingua y cultura asturiana ye refugada dafechu (son fondamente incultos y cosmopaletos), fai qu'el nuesu pueblu nun sepa nin use l'asturianu de xeitu estensu. Semeya como dalgu normal cuando ye nidiu la so anormalidá si facemos comparanza colo qu'asocede n'otros llugares del estáu............qué incultura tan espardida

-El futuru políticu d'Asturies ye alloriante. Polo que paez, l'añu que vien (añu eleutoral) vamos tener nel nuesu gobiernu o a los "socialistes talibanes" (dígolo pol so refugu dogmáticu a tolo que seya trabayar per tóu lo que nun seya una güeyada folclórica a la nuesa realidá como país) col "gran demócrata" Javier Fernández nel so llugar cimeru o "l'Asturies berlusconiana" que tendrá otru "gran demócrata" Francisco Álvarez Cascos nel so timón dirixente; por nun falar de lo que nun soi a caletrar que ye l'imposibilidá d'alcuerdu ente les fuercies polítiques asturianistes pa facer una candidatura conxunta (somos pocos y per riba engarriaos).

Tamos nel camín, un pasu p'alantre. Siguiremos lluchando por ser más felices en tolos aspeutos de la nuesa vida con una Asturies más asturiana, con trabayu pa toes/os de la que mos sintamos arguyosos.

No hay comentarios: